نِفسـك تتجـوّزي؟

نِفسـك تتجـوّزي؟

بصي بقى يابنتي
من أول السنة الجاية
لبس جديد
ميكاب جديد
برفان جديد
شنط وجزم بتلمع
المعيدين حيبقوا بالهبل ولازم نوقّع واحد
*******
كانت هذه احدى المناقشات التي سمعتها صديقتي في المدرج لأن الجزء العملي في كليتها حيبتدي السنة اللي جاية
و دة معناه انهم حيحتكوا بمعيدين شباب لسه متخرجين
يعني بالعربي عرسان لقطة
*******
ياحاجة ايه اللي بنتك لابساه ده؟.. حرام عليكي.. دي حتى محجبة
ردت الام بكل ثقة: عشان الصنارة تغمز
.....
ازاي يا بنتي انتي مش مصاحبة؟ انتي شكلك حتعنسي
انا بقى أوعى منك.. انا مصاحبة كام واحد.. وبعدين حنخلهم.. وانشن على احسنهم.. واتجوزه
*******
دي كام موقف من كتييييير من المواقف اللي بنشوفها او نسمع عنها
بصوا خلينا نتفق علي حاجة الاول
مفيش بنت في الدنيا مش اغلى امانيها انها تتجوز وتحب وتتحب وترتبط بدري
او تبقى جميلة وشيك في لبسها
بس انا احيانا بستغرب
هو الجواز بقى هدف ومجرد لقب و بعد كدة مش مشكلة
باستغرب برضه من مفاهيم الناس المتناقضة
تلاقي الناس تقولك: الجواز ده قسمة ونصيب ورزق من عند ربنا
طب لما هو رزق وربنا اللي بيرزق
ندعي ربنا انه نتجوز
و نروح نعصيه؟؟؟
*******
مرة المدرسة بتاعتي ايام لما كنت في ثانوي قالتلي: بصي.. جوزك اللي ربنا كاتبهولك محدش حيتجوزه غيرك.. بس الفرق انك لواتقيتي ربنا ربنا حيبعتهولك بأحسن الصفات.. و لو العكس حتتجوزيه برضه هو هو.. بس بعبله
دي كلمة مصري معناها بكل صفاته الوحشة
*******
في حديث للرسول جميل اوي: ولا يحملن أحدكم استبطاء الرزق أن يطلبه بمعصية الله فإن ما عند الله لا ينال إلا بطاعته
و انا حسأل سؤالين
تفتكروا البنت الي بتفكر كده لما تتجوز حتتطلع عيالها شكلهم ايه؟
سؤال تاني: تفتكروا بقى يابنات.. بعيدا عن الدين.. ودي عن تجارب سمعتها كتير انه في شاب حيتجوز واحدة كان مصاحبها؟؟
و لو فرضنا انه حصل.. تفتكري حياتهم حتبقى عاملة ازاي؟؟
ولاّ لو كان الشاب شايف ان البنت المودرن لازم تبقى كده و لومش كدة تبقي معقدة.. تفتكري دة يقدر يتحمل مسئولية ويحميكي ويهننك بعد الجواز؟؟؟
*******
ليه مفيش بنات دلوقتي تبقى شيك وجميلة بس من غير ما تعصي ربنا
تكلم الشباب في حدود زي ما ديننا علمنا
وتحاول تتقي ربنا عشان ربنا يرزقها بزوج كويس.. و يباركلها في حياتها
بدل نسب الطلاق اللي عمالة تزيد بطريقة فظيعة
ليه مفيش بنات بتفكر: ان لحد ما اتجوز اعمل حاجة تفيد الناس.. تفيد ديني.. احاول اطور نفسي
ليه مفيش بنات بتفكر ان الزواج ده يبقى وسيلة عشان ارضي بها ربنا
*******
فاكرين لعبة النوايا؟
ليه البنات متفكرش ان: اتجوز واحب زوجي واعفه واحصنه انه يقع في الحرام
و اطلّع جيل فاهم وواعي.. ينصر دينه
في دعاء جميل اوي برضه مدرستي علمتهولي عشان ربنا يرزقنا بالزوج الصالح
اللهم ارزقني زوج صالح حسن الاخلاق والخلق.. غني المال والدين.. في اخلاق ابو بكر.. وقوة عمر.. و رقة عثمان
*******
شفتي.. دعاء فيه كل حاجة نفسنا فيها
وربنا كريم
بس ربنا عايز يسمع صوتنا
ايوة ربنا عايز ندعيه كتييييييير اوي
ربنا بيحب العبد اللحوح
هو مبيزهقش
لكن احنا اللي للأسف بنزهق بسرعة
اهم حاجة نبقى مع ربنا
ونحاول نرضيه ونتقيه على قد ما نقدر
*******
اللهم تقبل منا دعاءنا.. وصلاتنا.. وصالح أعمالنا
*******

بجد تسلم ايديك اللي كتبت لينا الموضوع الجميل ده

تـــــــــــ ســــــــــــــــــــــ لــــــــــــمــ

ا يــــــ ــــــد يــــــــــــــ ـــــــــك

بجد أول موضوع أقراه هنا وأقول أكثر من راااااااااااااااااااااائع

بجد بجد أنتى بنت عشرة على عشرة

وأنا دائماً بقول لكل البنات

عايزة تتجوزى واحد عادى وتعيشى حياة عادية وتموتى عادى برده يبقى خليكى كده تبع العادى

وللشباب دائماً بقول لو عايز تتجوز بجد واحدة غير عادية وتعيشوا حياة غير عادية وتحققوا حاجة فى الدنيا دى علشان لما تموتوا يبقى موتوا وأنتم ناس مش عادية

ايه هو العادى بقى هو اللى للأسف بقى كثييير أوى فى دنيتنا دى واللى حكت عنه أختنا ويبقى الحب تسلم إيديك

واكيد اللى هتتجوز بالطريقة دى هى غير قادرة على أن تكون زوجة صح وأصلا متنفعش تكون أم يبقى الأحسن مش تتجوز أحسن وتجيب أطفال متعرفش تربيهم

ولما تموت يتكتب على قبرها ماتت عادية بن عادى
ولما يموت جوزها يتكتب على قبره مات عادى بن عادى

كفاية بقى ياشباب ويابنات اللى بيحصل ده

عيشوا الحياة جميلة أووووووووى بس من غير معاصى

وقربوا من ربنا قوى وخلى إيمانكم ويقينكم قوووووى

انكم هتتجوزوا اللى شبهكم

على قد ماانتى عايزة جوزك يكون كذا وكذا وكذا كونى أنتى كذا وكذا وكذا

وعلى قد ماانت عايز زوجتك تكون كذا وكذا وكذا كون أنت كذا وكذا وكذا

ولا تنسوا قول الله تعالى " الطيبون للطيبات"

بجد تسلم ايدك
موضوع جميل اوى

تسلم ايدك

الموضوع هايل

بعد اذنك هيطير لقسم المرأة

دي اسرار بنات يا جماعه

هههههههههههههه